逝者不可追，來者猶未卜，最珍貴、最需要即時掌握的「當下」，往往在這兩者蹉跎間，轉眼錯失。人生如寄，轉眼即逝。

悼李山泰

 [2022年7月30日] 

摘要: 山泰為人爽朗，學業及工作表現優秀，曾任船長及海事處事故調查官，貢獻航行安全。重視教育，熱心助人。退休後仍與舊友聯繫。離世令人惋惜，大家永遠懷念他............

Becky, Gibson, Jack, Rose, 在座咁多位山泰嘅同事同學同朋友，多謝你哋來到山泰嘅追悼會 山泰離開左我地了，呢個消息來得好突然。

2017年我退休左之後冇同佢聯絡一段時間，再聽到嘅就已經係佢離開嘅噩耗。我嘅心裡面係非常之難過。我叫李耀光，山泰係我響理工讀書個陣嘅同學 (佢遲我一年，係77年畢業) 。之後大家亦都係海事處同事。山泰當年讀書成績好好，記得佢提過響小學升中試因為成績優異，獲得左政府五年中學免費獎學金。小學之後佢入左維多利亞工業中學就讀，重上電視代表學校參加過星辰校際盃問答比賽。我能夠同佢做同學兼同事，自然感到呢一份殊榮。 我哋響理工讀完書之後都相計出海上船做嘢。

山泰響86年左右完成海上生涯，佢船上最後嘅職位，係響一艘往來澳門及台灣嘅華澳客船上做船長。上岸之後山泰到過幾間公司做嘢，有香港蜆殼石油公司同埋職業訓練局轄下嘅海員訓練學院等等。響蜆殼石油公司佢邂逅左Becky, 並響88年共諧連理。92年山泰被海事處取錄，任職成為助理海事監督。佢做嘢表現優秀，並響94年獲取海事處獎學金。同年9月佢一家人搬到英國Plymouth大學就讀海事課程。啱啱個陣時我同屋企人亦也響個度。記得個日響火車站接山泰一家到步嘅情況，依然係歷歷在目。個陣時佢細仔Jacky仍坐著BB車，Becky就拖著Gibson，(細女Rose重未出世)。 

我哋兩個家庭響Plymouth開心咁相處左一段長時間，亦認識左唔少當地嘅朋友。Gibson 同我個大仔Jonathan更加係friend過打Band。我哋呢段日子嘅生活係過得非常之愉快。 返香港後，我同山泰再做海事處驗船主任同事，響唔同嘅崗位做嘢。值得一提嘅係，我哋一齊被委派到海事意外調查組合作嘅一段日子 - 響呢段期間山泰曾經負責好幾單大案。

記得2007年有一隻香港註冊貨船Cosco Busan，響三藩市撞橋墩引致漏油，油污污染左三藩市大部分港口，事件轟動國際。山泰當時被委派遠赴美國調查跟進呢單意外，並且同埋當地政府一齊進行合作調查，得到滿意嘅調查結果。另一單係2008年3月，一艘內地貨船響香港機場冇幾遠嘅水域，撞沈左烏克蘭供應船。事件導致十幾個烏克蘭船員遇難。當時嘅事故調查官正正就係山泰，佢調查之後亦都撰寫左報告，對問題作出建議。響呢段日子，山泰對於航行安全作出嘅貢獻，可謂功不可沒。 

 重有，山泰對於下一代年青人嘅教育係非常之上心。佢除左比自己嘅子女都接受最好嘅教育外，重向週邊嘅朋友發光發亮。佢同朋友莫先生，組織左子女海外讀書家長會，並且周不時約出來一齊飲茶聚會，因為太受歡迎，每次都有幾圍枱，聚會比大家有機會交流一吓D細佬仔響英國嘅讀書心得，從而攞到有用嘅資訊。我個大仔Jonathan 更係其中受益者。響呢度，我充心感謝山泰同莫先生不遺餘力嘅付出。 

 山泰性格爽朗，做事不拘小節。講嘢個陣聲如洪鐘，中氣十足。佢豪邁嘅笑聲，使人覺得佢分外親切。響海事處我們都稱呼佢做泰哥，以示佢嘅威猛形象。 退休左之後，間中泰哥會響澳洲返來香港，我地都有飲茶。隨住歲月嘅流逝，我哋都慢慢開始變老。閒談中，泰哥經常提及到佢三個子女，並以佢哋嘅成就感到驕傲。 

我同泰哥，係同事兼死黨。 記得95年我由喺英國返香港，離開個陣時我送咗呢首歌‘送別’比泰哥，想唔到今日變成左永訣。 “長亭外 古道邊 芳草碧連天 晚風拂柳笛聲殘 夕陽山外山 天之涯 地之角 知交半零落 一觚濁酒盡餘歡 今宵別夢寒…” 

 泰哥，你保重啦。今日我哋來左，我哋帶住同學同同事嘅哀思同泰哥告別，願泰哥你一路走好，安心上路。我哋將會永遠懷念你。😞